মুম্বাই চিটীক ঘৰতে বিধ্বস্ত কৰি বৰ্ষ সামৰিলে নৰ্থ ইষ্ট ইউনাইটেডে*

 

*মুম্বাই চিটী এফ চি ঃ ০* 

*নৰ্থ ইষ্ট ইউনাইটেড ঃ ৩ [আজাৰাই ১, ৮৩ মিনিট, নিকচন ৮৬ মিনিট]*

*মুম্বাই, ৩০ ডিচেম্বৰ ঃ* ইণ্ডিয়ান ছুপাৰ লীগ [আই এছ এল] ৰ সোমবাৰে মুম্বাই ফুটবল এৰিনাত অনুষ্ঠিত হোৱা এখন একপক্ষীয় মেচত নৰ্থ ইষ্ট ইউনাইটেড এফ চিয়ে পূৰ্ব চেম্পিয়ন মুম্বাই চিটীক ৩-০ গলত পৰাস্ত কৰি পইণ্ট তালিকাৰ চতুৰ্থ স্থানলৈ উত্তৰণ কৰিছে৷ যোৱা মেচত হায়দৰাবাদ এফ চিক বিধ্বস্ত কৰি আত্মবিশ্বাসৰে মুম্বাইলৈ অহা গুৱাহাটীৰ দলটোৱে আজিৰ এই চমকপ্ৰদ জয়ৰে বৰ্ষ সামৰি সমৰ্থক দুগুন উৎসাহ দিবলৈ সক্ষম হ’ল৷

খেল আৰম্ভ হোৱাৰ প্ৰথম মিনিটতে নৰ্থ ইষ্ট ইউনাইটেডে গল কৰি বিপক্ষৰ শিবিৰৰ ৰণনীতি ভংগ কৰাৰ লগতে মুম্বাই চিটীৰ ৰক্ষণ বিভাগক চাপত পেলায়৷ অসম সন্তান পাৰ্থিৱ গগৈৰ এটা ক্ৰছত নৰ্থ ইষ্ট ইউনাইটেডৰ মৰোক্কোৰ ষ্ট্ৰাইকাৰ আজাৰায়ে চেণ্টাৰৰ পৰা শ্বট মাৰি মুম্বাইৰ দুৰ্গত বল সোমাই দিয়ে৷

২৫ মিনিটত নৰ্থ ইষ্ট ইউনাইটেডৰ অগ্ৰগতি ২-০ হোৱাৰ সুযোগ আছিল যদিও আজাৰায়ে পেনাল্টি শ্বট গল কৰাত বিফল হয়৷ উল্লেখ্য যে আজাৰাইক বিপদজনকভাবে বাধা দিয়াৰ বাবেই মুম্বাই চিটীৰ বিৰুদ্ধে ৰেফাৰীয়ে পেনাল্টি দিছিল৷ কিন্তু গলৰক্ষক পাৰাম্বাই দ্বিতীয়টো গল খোৱাৰ পৰা ঘৰুৱা দলক ৰক্ষা কৰে৷

প্ৰথম মিনিটতে গল কৰাৰ পাছত স্বাভাৱিকতে নৰ্থ ইষ্ট ইউনাইটেডে ৰক্ষণ বিভাগত অধিক দৃঢ়তা প্ৰদৰ্শন কৰে৷ দ্বিতীয়াৰ্ধত দলে সাল-সলনি কৰি তিনি পইণ্ট নিশ্চিত কৰাৰ ৰণনীতি লয়৷ কিন্তু পূৰ্বৰ কেবাখনো মেচৰ দৰে অন্তিম ক্ষণত গল খোৱাৰ কথা প্ৰশিক্ষক পেড্ৰো বেনালীয়ে পাহৰা নাছিল৷ 

সেয়ে অন্তিম দহ মিনিটত পুনৰ আক্ৰমন কৰে৷ ইয়াৰ ফলতে ৮৩ মিনিটত আজাৰায়ে সতীৰ্থ মাকাৰ্টন নিকচনৰ পৰা বল লাভ কৰি দ্বিতীয়টো গলেৰে ব্যৱধান ২-০ কৰে৷ এয়া আজাৰাইৰ চলিত লীগত ১৪ নম্বৰ গল৷ আনহাতে, নিকচনে ৮৬ মিনিটত নৰ্থ ইষ্ট ইউনাইটেডৰ হৈ তৃতীয়টো গল কৰে৷ চাপৰ বাবেই আজি মুম্বাইৰ ৰক্ষণ বিভাগৰ দূৰ্বলতা খেলত প্ৰতিফলিত হয়৷

ঘৰত পৰাজয় হোৱাৰ পাছত মুম্বাই চিটিয়ে ১৩ খন খেলত ২০ পইণ্ট লাভ কৰি তালিকাৰ সপ্তম স্থানলৈ অবনমিত হৈছে৷ আনহাতে ১৩ খন খেলত ২১ পইণ্ট সংগ্ৰহ কৰি চতুৰ্থ স্থানলৈ উত্তৰণ কৰিলে নৰ্থ ইষ্ট ইউনাইটেডে৷

নতুন বছৰৰ প্ৰথমখন মেচ নৰ্থ ইষ্ট ইউনাইটেডে ঘৰত খেলিব৷ অহা তিনি জানুৱাৰীত গুৱাহাটীৰ সৰুসজাই ক্ৰীড়া প্ৰকল্পৰ ইন্দিৰা গান্ধী এথলেটিক ষ্টেডিয়ামত হ’বলগা মেচত দলে মহমেদান স্প’ৰ্টিং ক্লাবৰ বিৰুদ্ধে খেলিব৷ উল্লেখ্য যে কলকাতাত মহমেদানকে হৰুৱাই আই এছ এলত ছিজনৰ আৰম্ভনি কৰিছিল নৰ্থ ইষ্ট ইউনাইটেডে৷

ইফালে, মুম্বাই চিটীয়ে পৰবৰ্তী মেচখন অহা ছয় জানুৱাৰীত ইষ্ট বেংগল এফ চিৰ বিৰুদ্ধে খেলিব৷ এই মেচখন কলকাতাৰ বিবেকানন্দ যুৱভাৰতী ক্ৰীড়াংগনত অনুষ্ঠিত হ’ব৷